لاہور: وزیراعلیٰ خیبرپختونخوا سہیل آفریدی کی لاہور آمد پر احتجاج کے بعد پولیس نے پاکستان تحریک انصاف (پی ٹی آئی) کے 14 کارکنوں کو گرفتار کر کے تین مقدمات درج کر لیے ہیں۔ تفصیلات کے مطابق وزیراعلیٰ سہیل آفریدی کے دورہ لاہور کے دوران ریلیاں نکالنے، احتجاجی سرگرمیوں میں ملوث ہونے، سڑکیں بلاک کرنے اور نعرے لگانے پر پولیس نے پی ٹی آئی کارکنوں کے خلاف کارروائی کی۔ شادباغ پولیس نے دو اضافی کارکنوں کے خلاف بھی مقدمہ درج کر لیا۔ پولیس نے بتایا کہ گرفتار افراد کا تعلق راولپنڈی، لورالائی اور کالا شاہ کاکو سمیت مختلف شہروں سے ہے۔ کارکنوں نے مبینہ طور پر سڑکیں بلاک کرکے ٹریفک کی روانی میں خلل ڈالا اور نعرے بازی کی۔ دفعہ 144 کی خلاف ورزی سمیت مختلف دفعات کے تحت مقدمات درج کیے گئے۔ اکبری گیٹ پولیس نے 9 افراد کو گرفتار کر کے ان کے خلاف ریاست مخالف سرگرمیوں کے الزام میں مقدمہ درج کر لیا۔ دریں اثناء قلعہ گجر سنگھ پولیس نے 10 سے 15 کارکنوں کے خلاف مقدمہ درج کر کے پانچ کو گرفتار کر لیا۔ مقدمے میں سرکاری فرائض میں مداخلت سمیت پانچ الزامات شامل ہیں۔ پولیس نے دعویٰ کیا کہ ملزمان نے گرفتاری میں مزاحمت کی اور پولیس کانسٹیبل کی وردی پھاڑ دی۔ گرفتار کارکنوں سے سیاسی جماعتوں کے جھنڈے اور پوسٹرز بھی برآمد کر کے تحویل میں لے لیے گئے۔ پولیس کا کہنا ہے کہ مقدمات میں نامزد باقی ملزمان کی گرفتاری کے لیے کوششیں جاری ہیں۔ خیال رہے کہ وزیراعلیٰ خیبرپختونخوا سہیل آفریدی اس وقت لاہور کے دورے کے دوران شاہ جمال میں پی ٹی آئی لاہور کے صدر میاں اکرم عثمان کی رہائش گاہ پر مقیم ہیں۔ پارٹی ذرائع کے مطابق میاں اکرم عثمان کو گزشتہ رات پولیس نے ریگل چوک سے حراست میں لیا تھا تاہم تاحال ان کے ٹھکانے کے بارے میں کوئی معلومات سامنے نہیں آئیں۔